ҚАЖЫЛЫҚТАҒЫ ШЫНАЙЫ НИЕТТІҢ 10 ПАЙДАСЫ
1) ҚҰЛШЫЛЫҚ ҚҰЛШЫНЫСПЕН ОРЫНДАЛАДЫ. Ниетіңіз шынайы болса, құлшылықты құлшыныспен жасайсыз. Себебі ниетіңіздегі шынайылық әрекетіңізді нақтылап тұрады. Қашан адамның ниеті бұзылса, құлшылыққа немқұрайды қарай бастайды. Адамзаттың ардақтысы Пайғамбар /с.ғ.с./: «Шын мәнінде амалдар ниетке байланысты...» деген;
2) КҮНӘДАН ТАЗАРТАДЫ. Ниеттегі шынайылық адамды күнәдан тосады әрі бұрынғы күнәлары үшін шынайы тәубе етуге үйретеді. Егер ниетіңіз шынайы, құлшылығыңыз құлшынысты болса, анасынан жаңа туған бейкүнә сәбидей күнәдан тазарасыз;
3) САУАПҚА КЕНЕЛТЕДІ. Ниетіңіз тек Аллаһтың разылығын қалап тұрғандықтан сіз құлшылықтарға өте мән бересіз. Сондай-ақ қосымша құлшылықтар, жақсылықтар жасауға барыңызды саласыз;
4) АЛЛАҺҚА СЕРІК ҚОСЫП ҚОЮДАН САҚТАЙДЫ. Ниетіңіз тек бір Аллаһтың разылығына жету болғандықтан сіз Аллаһты ашуландыратын амалдарға аяқ баспайсыз;
5) АРТЫҚ ЖҮРІСТЕН ТОСАДЫ. Ниетіңіз қажылық болғандықтан қыдырумен уақыт жоғалтпайсыз. Ары-бері қыдырыстан көрі қажылық рәсімдеріне тыңғылықты дайындалуды жөн көресіз;
6) РИЯҚОРЛЫҚТАН САҚТАЙДЫ. Қажылық ниетіңіз шынайы болғандықтан рия, мақтангершілік амалдардан бойыңызды аулақ ұстайсыз. Басқалардың сізді «қажы» деп атағанын қаламайсыз;
7) ҰРЫС-ЖАНЖАЛДЫҢ АЛДЫН АЛАДЫ. Қажылық барысында ұрыс-жанжал көп жағдайда ниет шынайы болмаған кезде туындайды. Ниеті тек қажылық болғандықтан пенде қажылықты бұзатын әрекеттерге бармайды.
8) САБЫРЛЫҚҚА ШАҚЫРАДЫ. Шынайы ниет пендені сабырлыққа үйретеді. Себебі Аллаһтың разылығына жетсем деген шынайы ниетіңіз шаршап-шалдыққан кезде ойыңызға сергектік, бойыңызға қуат береді;
9) ДҰҒА-ТІЛЕКТЕР ҚАБЫЛ БОЛАДЫ. Шынайы ниеттеніп жасалған дұғалар қабыл болады. Себебі Аллаһ ықыласты құлдарын жақсы көреді;
10) ЖӘННАТҚА КІРГІЗЕДІ. Ниеті таза болып, қажылықты ықыласпен шарттарына сай орындаған адам Аллаһтың қалауымен Жәннатқа кіреді. Бұл жайында Пайғамбар /с.ғ.с./ «...қабыл болған қажылықтың сыйы тек қана - Жәннат» деген.
Аллаһ баршаңыздың қажылыққа қатысты ниеттеріңізді шынайы қылып, барша пайдаларға қол жеткізуді нәсіп етсін!
www.qazaqtravel.kz
